KUM PI TE KUM PI --- ZEISU CHRIST

KUM PI TE KUM PI --- ZEISU CHRIST

( Rev 19:16)

Kong it Zomi sangam U leh Nau aw Zogam leh Zomi a it, a vei tak tak na hih leh bang ciang sem khin a koi ciang sem thuah lai ding ih hiam? Na lung lut leh ki kum khom ni ----

      a nuai ah maw.

1. SING LAM TEH  & CONSTANTINE --- EMPIRE OF ROMAN ( AD-313 ).

( Gal 2:20; 3:13)

Kumpi te Kumpi Christ (John 18:37)  in lei tung ah a piak nop te pia a, alak khiat nop te zong la khia hi. Constantine thu en khawm ni. Pasian in vision khat pia a, a gal sim ma diak in a vision sung ah singlamteh khat mu hi. A man zong tua a muh “Cross” pen gal zawh na lim hi ding hi ci in um a hih man in a gal sim na ah zang pah a agual zo tak pi hi. Tua a muh Cross-vision a kan tak ciang in Christian te ii thu pi sak mah mah khat cih a theih ciang in a man zong a biak na laih pah lian a agal kap te leh a gam mi te zong a vek in Christian suak sak hi. Bang bang hi ta leh tua pen Pasian in a mah a piak gual zoh na hi mawk hi. Zomi te in zong Gup khiat na Singlamteh i  a ngah theih gual zoh na bu kim ih lak kul hi.Topa Zeisu in samsiat na a ki ci  a hoih lo na khem peuh pan in thu pha a ki ci a hoih gual zoh na bu kim ong pia khin zo hi. Gam lian mi nam lian te i mi nam neu a om tha paih na te zong  tua Singlamteh tung ah ong thah lup sak khin zo a mi nam lian gam lian pi khat a ding zo ding in Singlamteh gual zoh na ong pia khin zo hi. Topa Zeisu Christ in a ma Singlamteh gual zoh na sung ah Zomi bup a ding in a suak ta gam khat kumpi ki uk na khat ciang dong ah gual zoh na ong pia khin zo hi. Up na tawh han ciam peuh leng a hun a tun teh ong piang ding hi. Isreal te thu kan 12 sung pan mi 10 in up na nei lo a Canaan gam nuam lut kha lo uh hi. Mi 2 ( Joshua & Calep ) in um mah mah a Canaan gam a mi nam lian 7 te do gawp in lut kha pah uh. Zomi te in zong Constantine bang mah in   Christ Singlamteh gual zoh na tawh a suak ta Zogam & Zomi te kum pi gam a thak in lam kik ni. Up na in zoh na hi. Christ ong piak Zogam thak ih phuh zoh ciang in ih gam, ih lei, ih mi nam nu sia sia nawn lo in Zogam mual tung khem peuh zo in Uk pah ni….maw…Zomi.

2. PASIAN KAMMAL(Laisingtho) & JAMES (Empire of England,1517-1945 AD)

(Psalms 119:105)

Lei tung ah ni tum lo gam ci a, minthang England Empire uk na gam te i gual zoh na en kik ni. Ni dang lai in Laisiangtho pen mi kim in sim khuan ngah lo a, ei ai tuam lai tawh zong at (translate – Copy) khuan om lo hi. Hebrew&Greek leh Latin lai te bek tawh ki sim thei bek hi. Tua lai tak in England kumpi pa James a ki ci khat pa’n Pasian kammal cih pen mi kim in sim khuan, neih khuan leh tawi khuan a om kul hi ci-in mikang lai ( pau ) tawh a ma sa pen pen Laisiangtho (King James Version) ong tei khia a tua Pasian kammal tawh ki tuak in a gam mi te a uk tak ciang in a gam khang to in Tembaw tampi lam in colony gam ki zon (ki tuh) hun ki pat lam pan Leitung gal pi nih na bei dong, ni tum lo gam ci-in lei tung tangthu ah a min thang mah mah khat a hi hi. Tu hun dong mah mi kang pau leh lai, a mau ii ngei na tumging leh laa(solfa) te mah in lei tung ukzo lai hi. Zogam leh Zomi a it ei a ding in zong England kumpi James bang mah in ih gam ih mi te a ma sa pen pen in Pasian kammal Laisiangtho tawh ki tuak in  nung ta, gam ta, kam pau, sem khawm, bawl khawm hi le hang ih Zo gam, ih Zolai(Tedim), ih Zo pau(Tedim), ih Zo ngei na tat zia zat dan te in a suak ta Zomi kumpi ki uk na gam thak sung ah mun ong la in ong gual zo a ong Uk zo pah lel ding hi. Bang hang hiam cih leh Laisiangtho pen kumpi te Kumpi pa Christ Topa kam mal thusiangtho tak tak hi. Kumpi te Kumpi pa Christ Topa’n  thu kham (law) na nei a,

1.      Lungsim&Kha tawh Pasian it ding, (Matt 22:37-38).

2.      Ei mah bang a mi dang te it ding, ( Matt 22:38;Gal 5:14).

3.      Thu um mi khat leh khat ki it ding, (John 13:34).

Hih thu 3 teng pen thu 1 in gen leng “it na” hi. Isreal mi nam te in Pasian kammal thu sim lo a, nun tak pih lo a hih man in a gam uh  AD 70  kum in taan uh hi. A hih hang Europe gam sung teng ah a ki theh thang hun sung un sim mawh nen niam na thah na bawl siat na tam pi a thuak khit uh ciang in Pasian ong phawk uh a, May 4, 1948 kum in a gam uh ngah kik uh a ong ciah kik uh hi. Zomi te in zong numbat 1 na ah Pasian kammal ih nuntak pih a, ih zuih pah tak pi leh ih Pu ih Pa te ten na Mual tung gam khem peuh Zomi te khut sung ah ong pia kik ding hi. Tua pen Christ Topa kammal & Singlamteh gualzoh na hi. Pasian in Gam lian te i mi nam neu a om tha pai ding in ong deih lo hi. Khen sat na hoih tawh tha saan in han ciam na tawh ma pang khawm ni,,, maw…Zomi.

3. MISSION KHAH AMERICAN GAM ( AD1600 – around )

(Matt 28:18-20)

Tu lai tak a lei tung bup (UNO) a khut nuai ah koih in a uk thih thiah thu pha ngah America gam thu khat vei ki kum kik leu leu ni. Ih theih sa bang mah in American te a zo kua mah om nai lo hi. Economic lam leh technical lam khawng pan a ban zo kawm kawm gam a om tei hang, gal kap na lam pan a tui lam gal  uh pen koi gam koi gam hi ta leh a zo zo ding gam tu ciang ciang om nai lo hi.

Tu lai tak in zong ten nang, na sep nang, sum zon nang in American gam a ut lo kua mah om lo phial cih ding zah hi mai hi. A hang khat om a tua pen ih theih sa Columbus leh a pawl te ban ah American gam thak sat hon khat te i thu ki kum khawm ni. Tua te pen Pasian leh  a ma Laisiangtho kammal  a thu pi sak numbat 1 na ah koih in Laisiangtho in kang acih leh kang, Laisiangtho in vom a cih leh vom a ci giap giap ngam pawl khat na om a, Europe gam pan in Pasian thu man thu tak hang in Mi- flower  tembaw pi tawh ong pai lai tak in khi tui nap tui luang ngek ngek inthu ong ngen uh a “ Topa Pasian aw hih American gam thu pha nong piak ding leh gamlian in bawl in lei tung bup ah Nang ma na sem (mission) tampi ka khah khia ding uh hi” ci-in thu nget na tawh American gam thak ong sat uh a Pasian in tua thu nget na dong in thu pha pia a Leitung gal pi 2 na bei a ki pan, tu dong in leitung bup a uk leh mission tampi tak khah uh a hih man in Leitung ah Uk na Aa Naa nei zo uh hi. Ei Zomi te in zong a mau ong khah Carson & Cope te hang in lai & pau a nei mi nam thu pi khat ih suak hi. Tu hun American gam i et theih loh gam te pen a heh pih huai gam ong suak lel hi mawk hi. A sum tung vuah “ In God We Trust” ci - in tuang sak uh a American dollar leitung a uk zo sum nam khat ong suak na hi mawk hi. American gam thak sat te zah in Zogam leh zomi te vei na leh khi tui nap tui luang a thu nget na tawh ih Zogam & Zomi a thak in khat vei Khasiangtho vangliat na tawh sat pha kik in Pasian na mah sem tak pi leng American gam bang mah in Pasian in thu pha ong pia ding a Gam minthang, Gam lian, Leitung bup na ngawn a hek meng meng zo ding in Zomi te mi nam lian ih suak ding hi. Ih Zomi pih  ei sang a a tam zaw alian zaw a hau zaw te zahtak kei ni. Zomi te lam ah Pasian ong om peuh leh ih lang ah kua pang zo ding hiam? Isreal mi te in hak sat na a tuah uh ciang in a mi nam bup pi un an tang & tui dawn lo in ni 3 sung bang lung sim ki tam zaan in kah na tawh thu na na ngen uh hi. Ei Zomi te a ding in zong ih it na leh ih vei na zah zah tawh lung sim ki tuak in thu ih nget khop theih na ding ni pen ni 1 ahi zong ni 2 ahi zong ni 3 bang a hi zong na sia tak in ih om na tek ah zang thei leng. Nih leh thum lung ki tuak a thu nget na ong pia nuam Pasian in Zomi bup lung ki tuak a thu nget na ong dong lo in om ding a hiam?

Zogam leh Zomi a ding in mi kim in na sem thei hi hang, koi mun, koi gam leh bang na bang na sem hi ta le hang, ih om na tek pan in e,

1.      Constantine bang in Zeisu “Cross” gual zoh na la in,

2.      King James bang in “Laisiangtho” mah bul phuh na leh,

3.      Mi-flower tembaw tung pan “Pasian tawh thuciam na” a la American gam thak sat te bang in,

kum pi te Kumpi Christ Topa kiang pan,  Ih Zogam &Zomi lam kik ni,

----------------------------------------------------,  Kumpi Uk na la ni,

----------------------------------------------------,   Ih pau, ih lai, ih ngei na leh tat zia te tawh Lei tung ah gual zoh na la ni. Topa lak toh na hun ong tun ma ,tu a khang no te hun a bei ma kum (40) vision tawh thu ngen ni, kei ki pan ta ing,han ciam ni maw,….. Zomi.

Zomi  a it leh a vei,

H.S, Mungpi.

Naypyidaw.