Happy Father's Day !

Joseph: A Tapa Adinga Pasian In A Teel "Pa" 

Thupatna

Nute Ni hong piankhiatna thu i gen theih zel mah bangin Pate Ni hong piankhiatna zong tawmkhat i gen ding hi. 1908 kum a kibawl Nute Ni banglo in Pate Ni bawl ding a kigen leh a kizat taktak sawt nailo hi. 1908 kum July kha ni 5 ni in bel America gam Virginia State sunga pawlpi khat ah a tua hun madeuh 1907 kum December kha sunga Moningah a cihna mun-a Fairmont Coal Company-te' suang meihol tawhna munah tuahsia-a asi pasal tingteng 362 te pahtawina in thuhilhna sermon kinei hi. Khatvei bek a kizang hi-a akumkik ciangin zong kizom toto cihbang om nawnlo hi.
A kumkik 1909 kum ciangin Washington State sunga Spokane khua a teeng, anu un nusia baih ahih manin apa un akhansuah unau 6 apha Sonora Smart Dodd kici numei khat in nute a kipahtawi banga pate a kipahtawi ding hong hanciam hi. Pawlpi tuamtuam ah pai kawikawi in hong hanthawn kawikawi a, kumpi ulian tampi tawh zong kimu in a lunggulhna hong pulak kawikawi hi. YMCA kipawlna leh kipawlna tuamtuamte ah zong thu gen kawikawi a, ama' hanciamna tawh Washington State buppi-in 1910 kum July kha 19 ni in Pate Ni bawl uh a, amasa pen hong hipah hi.
1906 kumin President Wilson in Washington State in tua banga Pate Ni abawlna uh pahtawina nalak ngei a, 1924 kumin President Calvin Coolidge in state tuamtuam-a kumpi thuneite in Pate Ni abawl dinguh hanthawn hi. 1920 kum leh 1930 kumin Nute Ni leh Pate Ni a kibangin nikhat thu-in kibawl khawm henla, Parent's Day kici leh cih thu zong ging sim pha mahmah ngei hi. America gam pan kipan leitungbup ah "the Great Depression" a kici sumlei sumzuakna khempeuh sia gawp a, nuntak haksat mahmahna khat hong om ciangin tua thu zong hong dai kik a, Leitung Galpi Nihna (World World II) hong ven ciangin gal sunga si mite pahtawina neih ding leh Pate Ni bawl ding hong gingkik hi. Pate Ni taktak pen kumpi Richard Nixon in 1972 kumin kumpi zumkhak ni thupi khat a zat dingin na kipsak hi.
Topa Zeisu pen Pasian Tapa hi a, a tawntunga om Pasian ahi hi. Ahih hangin mawhnei leitung mite tankhia dinga hong pai ciangin "pa" khat kisam hi. Mihing ngeina ah nu khat bek tawh ta piang theilo a, pa khat kisam hi. Ahi zongin Topa Zeisu ahih leh Kha Siangtho in gai sak hi. Ahi zongin mihing muhna ah "pa" khat kisam ahih manin leitung mi hizah lak ah Pasian in Zeisu' pa a kici dingin a lungsim hoih mahmah "Joseph" na seh hi. Ci leh sa tawh kisai in Mary pen Pasian' Nu ahih mah bangin Joseph zong Pasian' Pa hong hi helzen hi. Lungkham haksatna tampi a thuak lawh phial zongun mihing veve bel hampha mahmah mawk sam mataw!
Tua ahih leh Pasian' Tapa leitungah mihingin hong piankhiat khit teh kum 30 val sung bang a nuntak sung "pa" a aneih Joseph nuntakna en in pate in tha la dih ni.

I. Azi Ata A It "PA" hi.

Joseph pen azi ata a-it ngiat "pa" khat ahi hi. Azi a-it luatna Matthew 1:18,19 ah Mary gai hi, cih thu kigen mawk hi. Amau pen a minam ngeina uh tawh zuthawl kipia in a kidong khinsa ahi uhhi. Jew ngeina pen ei Zomite' ngeina sangin kipzaw pek a, a kiteengkhin tawh akibang ahi hi. A tamzaw kumkhat sung ki en uh a, deih loh penin a numei gai kha zenzen leh a pasal in khua hausate kopah in tua nu pen mipi in suang tawh a denlup ding ahi hi.
Joseph in omkhop pih nai vetlo in a lawmnu hong gai mawk cih pen suang tawh denlup theih dinmun hong hita mawk hi. Ahi zongin Joseph pen mi lungsim hoih khat ahih manin a lawmnu maaksim khian lel dingin hong khensat hi. A lawmnu maizum sak nuamlo cingiat hi. (Mathew 1:18,19). Aman maizumna khempeuh bukkhuk zaw in thuak zaw ding aci hingeu zen hi. Pasal khat ading a maizum huai lua mahmah, a mindai huai lua mahmah gamtat hi a, a lawmnu itlua, ngailua ahih manin amah min dai zaw ding, guallel zaw ding cih lungtang nei ngeu hi. Tua bang lungsim hoih ngaihsutna a neih laitak in Pasian' vantungmi khat a mang sungah kilang, cipan mawk hi. (Mathew 1:20-23).
Khazih in pawlpi it a anuntakna apiak bangin (Ephesian 5:25), pasal ten zite it ding hong kihilhna ah Joseph in Mary it khial het lo hi. Ama sunga piang taktak ata hi hetlo napi in a tapa Topa Zeisu zong ama sisan tawh apiang a tapa bangin it ngiat hi. I Topa a suah zawh sawt nai hetlo zankhat, vantungmi in, "Tho in, naupang leh anu Egypt gamah taipih inla, kong genkik mateng tualai ah ompih in; banghang hiam cih leh Herod in naupang that nuam in a zong hi" (Mathew 2:13) ci-in gen biangbuang mawk a, taang 14 na ah "Joseph zong tho in naupang leh a nu a zan a zanin Egypt gamah taipih hi" ci zen mawk hi. Gam tua tan zankim zankhang a lal ding cih peuhmah baih ngeilo ding hi. Naupang Zeisu a itna kilang mahmah hi.
Pasian in a Tapa ading "pa" khat a teel pen teel khial hetlo hi. Ama' siampen khutsiam (lettama) zong hilh lai hi. Matthew 13:55 ah mite in i Topa' thugen a zak uh ciangin "Hih pa Joseph tapa khutsiampa hilo ahi hiam?" kici uhhi. Khutsiampa' tapa zong hi a, apa in hilh ahih manin khutsiampa zong ahi hi. (John 14:1 ah, tua apa Joseph in ahilhsa khutsiamna teng mah tawh eite' omna ding inn a lamlam ahi hi.). I Thimothy 5:8 ah, thu um mi khat in ama' inn sung vak ding tavuan la masa ding, ci-in hong kihilh hi. Pa gina khat i hih leh leitunga tavuan lianpen bel i innkuan sung vak ding, don dingin kem ding cih mah hiphotphot hi. Na khempeuh ah, abangkim ah Joseph pen a etteh huai "pa" hi denkeei mawk hi.

II. Pasian' Thu A Mang "Pa" hi.

Pasian' thu akawi amaam in zui ahih manin khial ngei hetlo pah hi. Maak a sawmsa alawmnu pen Pasian' sawlna mangin teenpih pah hi. Lokho mi khat om hi. A lo ah an tampi a pian kei leh leibat teng loh zolo ding cih thei hi. Ankung zong hoih mahmah hi. Himah leh zankhat thu in guahpi zu in, gialpi kia ziahziah a, huihpi hong nun gawp ciangin tua ankung khempeuh hong zan gawp dikdek a, a tapa ngaihsutna ah apa in Pasian nangawn a samsia phial dingin apa' tungsim ding ngaihsut sak hi. Tua ci hetlo in apa in "Kei ading tam khang Suangpi, Nangma' sung hong buak aw" ci-in la sa hiauhiau mawk hi. A tapa a gol teh Pasian thugen minthang khat hong suak a, a genkikna ah, "Tua ni a kapa' om dan leh a lasak kazak pen ka nuntak sung ka sermon lak ah ka mangngilh theihloh, ka lungsim ah a teeng den sermon ahi hi" ci lian hi. Ngaihsut huai mahmah hi. I tate in Pasian i muanna hong thei ding uh hiam?

III. A Pil Mahmah "Pa" hi.

A tawpna ah, Joseph pen azi ata a itngiat, Pasian a muangngiat ahih banah a pilvang gamtat mahmah "pa" zong ahi hi. Galatians 5:15,16 sungah, "mihai bang hilo in, mipil bangin kalsuan un, hunte gilo ahih manin hun na neih bangbang uh zat siam un, a mannei in zangun" ci-in hong hilh hi. Lai Siangtho i et ciangin Joseph sawtpi nungta lo mai hileh kilawm hi. I Topa a neulai teng a kigen nate ah Egypt gamah a taina uh a ciahkik uh ciangin Nazareth ah a teenna uh kum 12 aphak laitak-a Jerusalem ah pawi sim a apaina uh cihte lobuang apa peuhmah kigen nawn hetlo ahih manin sawtpi nungtalo in nusia baihkha hikha ngel ding hi. I Topa a sih ding laitak in a nu en a, a it anungzuipa ahi John en a, a nungzuipa' tungah anu akep nadingin ap ngiat hi. Apa om nawnlo ahihna kilang hi.
Leitungah sawtpi a nuntak loh hangin a nuntak sung sunsun ahoih pen dingin nungta a, azi ata akep avakna, atate a makaihna leh apattah nate etteh huai mahmah hi. Pasian in hun hong piak sung ama' minthan nadinga i zat ding hi a, i zi i tate' tungah i tavuan i zawh ding ahi hi.
Zeisu guak ta-a aneih uh hilo a, James, Joseph, Simon leh Judas kici tapa 4 leh tanu zong neilai hi. (Matthew 13:55, Mark 6:3). Tuate khempeuh pawlpi masa pen ahi Jerusalem pawlpi ah kihelkim uhhi.(sawltak 1:14). Tua teng lak ah James bangpen pawlpi makaipi (Sawltak 15:13-21) suak a, Paul a pianthak khit Jerusalem khuapi ah apai ciangin pawlpi mungpi (pillars) banga kingaih sunte lak ah Peter, John tawh kibangin i Topa' sanggampa Joseph tapa James zong kihel hi. (Galatians 2:9, James pen i Topa' naupa ahihna Galatians 1:19 ah Paul in na gencian a, nungzui James bel a kithat baih mahmahte lak ah kihel hi. (Sawltak 12:2). Tua banah Lai Siangtho, Thuciam Thak Bu 27 lak ah James leh Jude laikhak a gelhte zong Joseph tate mah ahi hi.
Ute naute, pa a kici peuhmah leh a kici lai dingte in, hih Joseph etteh ding hihang. Pasian in a Tapa' pa a hidinga ateelpa Joseph pen mihing mah hi a, kicing khin zo hetlo kha ding hi. Ahi zongin Pasian muanga athu amangngiat, azi ata itlua mahmah a, azin azan cilo in a kisapna munah a diang pah lianlian a nuntak hun a sauluat khol loh hangin Pasian in apiak hun amanpha a azang, a etteh huai mahmah "pa" ahi hi. Tukum Pate Ni in hih i Topa' "pa" Joseph nuntakna tungtawnin hih thu thumte sinkhawm ni ci-in kong zawn nuam hi. Topa Pasian in thupha hong piakim ciat tahen!
A gelh,
Rev Zam Khat Kham, PhD